مسئلۂ قومیت سید ابو الاعلی مودودیؒ کے ان مضامین کا مجموعہ ہے جو ترجمان القرآن میں 1933ء سے 1941ء کے درمیان مختلف موقعوں پر شائع ہوئے ہیں۔ بیسویں صدی کے اوائل میں ایک طرف مغربی نیشنل ازم کا دور دورا تھا اور دوسری طرف انگریزی استعمار سے آزادی کے مسئلے نے اہمیت اختیار کر لی تھی۔ اسی وجہ سے ہندوستان میں قومیت، وطنیت اور مذہب کے سوال نے اہمیت اختیار کر لی تھی۔ کیا مسلمان دنیا کی باقی اقوام کی طرح ایک قوم ہیں یا ان سے مختلف ہیں؟ کیا قوم کا وجود کسی زبان ، نسل اور علاقے کے اشتراک سے وجود میں آتا ہےیا اس کی کچھ مختلف بنیادیں بھی ہو سکتی ہیں؟ اس بحث میں ہندوستان کے بعض اہم علماء نے یہاں تک کہہ دیا کہ قومیں وطن سے بنتی ہیں اور ہندوستان میں بسنے والے تمام مذاہب کے لوگ ایک ہی قوم ہیں۔ سید مودودی ؒ نے ان مضامین میں اس تصور کو پوری تفصیل اور پختہ دلائل کے ساتھ رد کیا ہے۔ انہوں نے ایک طرف مغربی نیشنل ازم کا تنقیدی جائزہ لیا اور دوسری طرف قرآن و سنت سے استنباط کرتے ہوئے علماء کے پھیلائے ہوئے اس غلط تصور کو رد کیا کہ مسلمان اور ہندو وطن کی بنیاد پر ایک قوم ہیں۔